পৌৰাণিক আখ্যানত মহিষাসুৰ আছিল অত্যাচাৰ, অহংকাৰ আৰু অশুভ শক্তিৰ প্ৰতীক। মহিষাসুৰ অত্যাচাৰৰ পৰা সমাজক মুক্ত কৰিবলৈ দেৱী দুৰ্গাই যুদ্ধ কৰি মহিষাসুৰক বধ কৰিছিল। যি অন্যায়ৰ বিৰুদ্ধে প্ৰতিৰোধ আৰু ন্যায়ৰ প্ৰতিষ্ঠাৰ প্ৰতীক। কিন্তু এতিয়া সময় সলনি হৈছে, সলনি হৈছে সমাজৰ প্ৰত্যাহ্বান। বৰ্তমান যুগত ভুৱা খবৰ, অপপ্ৰচাৰ আৰু তথ্যৰ বিকৃত উপস্থাপন সমাজৰ বাবে-সাংবাদিকতাৰ বাবে এক গুৰুতৰ সংকট হৈ পৰিছে। পৌৰাণিক যুগত মহিষাসুৰে যেনেকৈ সমাজৰ শান্তি বিঘ্নিত কৰিছিল, তেনেকৈ আজি ভুৱা খবৰ, অপপ্ৰচাৰ আৰু তথ্যৰ বিকৃত উপস্থাপনে মানুহৰ মাজত বিভাজন, বিদ্বেষ আৰু অবিশ্বাসৰ সৃষ্টি কৰি সমাজ অস্থিৰ কৰিছে। এই পৰিস্থিতিত সত্যৰ পক্ষত থিয় দি সমাজক বিভ্ৰান্তিৰ পৰা ৰক্ষা কৰাটো সাংবাদিকতাৰ এক গুৰুত্বপূৰ্ণ দায়িত্ব।
তথ্য-প্ৰযুক্তিৰ দ্ৰুত বিকাশে বাতৰি প্ৰচাৰৰ গতি বৃদ্ধি কৰিছে। সামাজিক মাধ্যমৰ জৰিয়তে মুহূৰ্তৰ ভিতৰতে এটা খবৰ লাখ লাখ মানুহৰ ওচৰ পাইছে। কিন্তু তথ্যৰ এই দ্ৰুত প্ৰবাহৰ মাজতে ভুৱা খবৰ আৰু পৰিকল্পিত অপপ্ৰচাৰে বিপজ্জনক ৰূপ ধাৰণ কৰিছে। মিছা খবৰে সাম্প্ৰদায়িক উত্তেজনা সৃষ্টি কৰিছে, বিভাজন, বিদ্বেষ আৰু অবিশ্বাসৰ সৃষ্টি কৰিছে, জনসাধাৰণৰ মাজত আতংক বিয়পাব দিছে বহু সময়ত। সেয়েহে ভুৱা খবৰ কেৱল তথ্যৰ সমস্যা নহয়, ই সামাজিক সম্প্ৰীতি-গণতান্ত্ৰিক মূল্যবোধ আৰু জনসাধাৰণৰ আস্থাৰ প্ৰতিও ভাবুকি।
এনে পৰিস্থিতিত সাংবাদিকতাৰ ভূমিকা অত্যন্ত গুৰুত্বপূৰ্ণ। প্ৰকৃত সাংবাদিকতাৰ উদ্দেশ্য কেৱল ঘটনা প্ৰকাশ কৰা নহয়, তথ্যৰ সত্যতা নিৰূপণ কৰা, ক্ষমতাৰ অপব্যৱহাৰ উন্মোচন কৰা আৰু জনস্বাৰ্থৰ বিষয়সমূহ পোহৰলৈ অনাও অন্যতম দায়িত্ব। আনতকৈ আগতে বাতৰি প্ৰকাশ কৰাতকৈ সত্য আৰু নিৰ্ভৰযোগ্য তথ্য জনসাধাৰণৰ ওচৰলৈ লৈ যোৱাটোহে অধিক গুৰুত্বপূৰ্ণ।
দেৱী দুৰ্গাৰ হাতত থকা অস্ত্ৰসমূহ অশুভ শক্তিৰ বিৰুদ্ধে যুঁজৰ প্ৰতীক। একেদৰে, সাংবাদিকৰ হাতত থকা কলম, অনুসন্ধান, যুক্তি আৰু প্ৰমাণ হৈছে অসত্যৰ বিৰুদ্ধে যুঁজ দিয়াৰ শক্তিশালী আহিলা। যিদৰে দেৱী দুৰ্গাই মহিষাসুৰৰ আধিপত্যৰ অন্ত পেলাইছিল, তেনেকৈ সাংবাদিকে বৰ্তমান সময়ত ঘটনাৰ প্ৰকৃত সত্যসত্যতা নিৰূপণ আৰু অনুসন্ধানৰ জৰিয়তে ভুৱা খবৰ উন্মোচন কৰিব লাগিব। কাৰণ সাংবাদিকৰ দায়িত্বই হৈছে সমাজত সত্যৰ প্ৰতি আস্থা অটুট ৰখা, অসত্যৰ প্ৰচাৰ ৰোধ কৰা, আৰু জনসাধাৰণক সচেতন কৰা ।
অৱশ্যে এই যুঁজ কেৱল সাংবাদিকৰ একক দায়িত্ব নহয়। নাগৰিকসকলেও কোনো খবৰ সত্যাসত্য নিৰূপণ নকৰাকৈ প্ৰচাৰ কৰাৰ পৰা বিৰত থাকিব লাগে। সংবাদ মাধ্যম আৰু সচেতন নাগৰিকৰ সামূহিক প্ৰচেষ্টাইহে ভুৱা খবৰৰ বিৰুদ্ধে শক্তিশালী যুঁজ গঢ়ি উঠিব।